中環大牌檔碟頭飯

中上環午膳第25撃，趁天氣轉涼，與鐵男嘗嘗波記大牌檔的碟頭飯。

波記位處暗巷，又窄又斜，環境當然係欠佳，不過就風味十足。兩個爐頭火光熊熊，師傅舞動大鑊，一氣呵成，不消一分鐘上碟。一位師傅炒粉麵，另一位炒餸/ 飯，一人有一個助手遞材料、遞碟、遞飯盒，加上負責落單及包外賣的阿姐，大聲傳話，迅速走位，效率其高。鐵男話係咁0既環境下，都不其然食快0左好多，哈哈！單是欣賞師傅獻技已是賞心樂事。

我們選了一乾一濕，一河一飯：

乾炒牛河($23)：勝在鑊氣夠，河粉條條分明，醬汁與牛肉不過不失。我估濕炒河會出色D。

福建炒飯($26)：炒飯底加上熱辣辣的蝦仁、火腿、肉絲、菇菇、菜梗粒粒等，落足料好慷慨，隻蝦仲彈牙添！獻汁略鹹及稍嫌多味精，不過真係好味，正過唔少酒樓與茶餐廳，咁大碟非常抵食，如果三個人嗌兩碟share都夠哂喇！同檯叔叔點的蝦醬炒飯香氣撲鼻也很吸引。

以這裏的衛生環境，坐下的九成是男性，OL都是選擇外賣居多。

食飽飽再去附近買杯鮮榨果汁，便宜又滿足的午餐。

地址：中環士他花利街。若在中環出發，可沿皇后大道中，經H&M、中環街市一帶，再經太興，見士他花利街上幾級樓梯即到。如在上環出發，從新紀元廣場沿皇后大道中，往中環方向行3個街口就到喇！